អគ្គស្នងការនគរបាលជាតិ អំពាវនាវដល់ស្នងការគ្រប់រាជធានីខេត្ត ត្រូវអន្តរាគមន៍ ឲ្យបានទាន់ ពេលវេលាជូនប្រជាពលរដ្ឋក្នុងឱកាសបុណ្យចូលឆ្នាំថ្មី
11-April-2019 | ដោយ ពលមនសិការ
ភ្នំពេញ៖ ឯកឧត្តម នាយឧត្តមសេនីយ៍ សន្តិបណ្ឌិត នេត សាវឿន អគ្គស្នងការនគរបាលជាតិ បានអំពាវនាវដល់គ្រប់ស្នងការរាជធានីខេត្តទាំងអស់ត្រូវបង្កើនការការពារជូនដល់ប្រជាពលរដ្ឋឲ្យបានទាន់ពេលវេលា និងត្រូវបង្កាឲ្យបានរាល់បទល្មើសផ្សេង នៅតាមវត្តអារាម ទីសាធារណៈនិងទីរមណីដ្ឋានផ្សេងៗ ដែលភ្ញៀវជាតិនិងអន្តរជាតិទៅកម្សាន្ត។
ក្រោយកិច្ចប្រជុំផ្សព្វផ្សាយអំពីផែនការការពារសុវត្ថិភាព សន្តិសុខ សណ្តាប់ធ្នាប់ ក្នុងឱកាសបុណ្យចូលឆ្នាំ នាព្រឹកថ្ងៃទី១១ ខែមេសា ឆ្នាំ២០១៩ នៅសាលប្រជុំអគ្គស្នងការដ្ឋាននគរបាលជាតិ ដោយមានគ្រប់នាយកដ្ឋាន ស្នងការរាជធានី-ខេត្តចូលរួមនោះឯកឧត្តមឧត្តមសេនីយ៍ឯក ឆាយ គឹមឃឿន បានលើកឡើងថា ឯកឧត្តម នាយឧត្តមសេនីយ៍ អគ្គស្នងការនគរបាលជាតិ បានសង្កត់ធ្ងន់ក្នុងកិច្ចប្រជុំនេះថា គ្រប់រាជធានីខេត្ត ទាំងអស់ត្រូវបង្កើនការការពារសន្ដិសុខ សណ្ដាប់ធ្នាប់ ជូនប្រជាពលរដ្ឋ និងសង្គមជាតិ គឺជាកាតព្វកិច្ចដែលមិនអាចខ្វះខាតរបស់កម្លាំងនគរបាល និងសមត្ថកិច្ចដែលពាក់ព័ន្ធនោះឡើយ។
លើសពីនេះទៀតឯកឧត្តម នាយឧត្តមសេនីយ៍ អគ្គស្នងការ បានបញ្ជាយ៉ាងម៉ឺងម៉ាត់ដល់ថ្នាក់ដឹកនាំនគរបាលត្រូវបែងចែកកម្លាំងឲ្យបានច្បាស់លាស់វេនប្រចាំការ ប្រចាំបញ្ជាដើម្បីអន្ដរាគមន៍ឲ្យទាន់ពេលជួយប្រជាពលរដ្ឋនៅពេលមានហេតុការណ៍អ្វីកើតឡើង ហើយពិសេសជាងនេះទៀតនោះត្រូវអប់រំប្រជាពលដ្ឋបន្ថែមទៀតឲ្យមានការប្រុងប្រយ័ត្ន អំពីគ្រោះថ្នាក់ចរាចរណ៍ និងអគ្គិភ័យជាដើមផងដែរ។ ខណៈបងប្អូនប្រជាពលរដ្ឋកំពុងធ្វើដំណើរទៅខេត្តជាបណ្តើៗហើយនោះ ឯកឧត្តម នាយឧត្តមសេនីយ៍ នេត សាវឿន ក៏បានណែនាំដល់នគរបាលត្រូវដាក់ពង្រាយយ៉ាងយកចិត្តទុកដាក់ ដើម្បីត្រួតពិនិត្យអ្នកបើកបរ ពិសេសកុំឲ្យបើកបរលើសល្បឿនកំណត់ និងហាមដាច់ខាតការបើកបរស្ថិតក្នុងស្ថានភាពស្រវឹងជាដើម ៕
ចំនួនអ្នកទស្សនា
- ថ្ងៃនេះ6201
- ម្សិលមិញ6261
- សប្តាហ៍នេះ24581
- ខែនេះ139731
- ឆ្នាំនេះ139731
- សរុប20582187